Mosul-a indo laiin civil mi 741 tihlum

United Nations chuan Islamic State (IS) firfiakte kut aṭanga Iraq khawpui pawimawh, Mosul laklet tuma beihpui an thlak lai kha, IS hian khawpuia cheng civil mi 741 chu rawng takin an tihlum niin a sawi.

Firfiakte hian mi tam tak an rukbo bakah, civil mite chu sipaite laka inphenna atan te an hmang a, chenna in te tichhiaiin, khawpui aṭanga tlanchhiat tumte chu an bei let fo bawk. UN human rights chief Zeid Raad Al Hussein chuan civil mite chunga tawrhna nasa tak thlennaa mawhphurtute chuan an tihsual man an hmu ngei tur a ni, a ti. Hussein chuan Iraq sipaite'n human rights an palzut nia sawi chungchang pawh chhui chiang turin a phut bawk.

Kum 2014-a IS firfiakten an lak, Mosul khawpui hi lak let tumin Iraq sipaite chuan kum 2016, November thla aṭang khan beihpui an tlak ṭan a, kumin July thla khan khawpui hi an la let thei ta a ni. Sipaite leh firfiakte inbeih chhung hian civil mi 2,521 zet an thi a, an zinga a tam ber chu IS kuta thi an ni. Khawpui chhunga cheng mi 824,000 chu himna zawngin an tlanchhe bawk.