Mars mission: China-in chona lian tak a hmachhawn dawn

India ṭhenawm ram, China chuan Ningani liam ta khan Khawvel ṭhenawm Sikeisen zirchiang turin spacecraft a kap chhuak a, khawvel ngaihven a hlawh nghal. China Mars Mission hi a hmain a lo hlawhchham tawh a, tun ṭumah hian eng chen nge China hian a thlen dawn tih hriat chakin van boruak lam tuipui mite leh ram hrang hrang sorkar hnuaia an space agency-te chuan Sikeisen lam hi an hawi ṭhup mai a ni.

Thla (Moon) zirchianna kawng­ah chuan China hian tawnhriat a nei nual tawh a. Ṭum li ngawt mai hlawhtling takin Thla hi chu a en thlithlai tawh, mahse Sikeisen erawh chona lian tak a ni dawn thung.

Sikeisen thleng tur hian thla sarih ngawt an spacecraft chhuan­vawr, Tianwen-1 hian hun a hman a ngai dawn. Hlawhtling taka kah chhuah pawh a hautak tawh mahnak laiin thla sarih chhung, zingkawng zawh zen zen loh a zawh dawn chu a ni a, tluang takin zingkawng hi zawh pawh nise nakkum February velah Sikeisen 'orbit' hi a thleng dawn chauh.

Chumi hnuah chuan a la ṭum nghal ngawt thei dawn lo a, thla hnih emaw thla thum emaw vel chu high-resolution camera hmangin ṭumna tur remchang a zawng phawt dawn a, May thlaah a ṭum dawn chauh a ni. Chu chu a hautak lai ber a la ni lo.

A hautak lai ber tur chu 'soft landing' lai a ni dawn a, hlawhtling takin a ṭum thei a nih chuan Tianwen-1 chu Sikeisen leilung zirchiang turin a chhuah tir dawn a, rover hi Sikeisen-ah ni 90 (Khawvelah thla thum ang vel) chhung vel hun hmang thei tura duan a ni, Sikeisen-a kum khat (Khawvel-ah chuan ni 687) dam thei 'orbiter' nen an inbe pawp reng ang.

Sikeisen leilung awm dan zirchian an tum a, morphology mapping pawh an tum ber pakhat a ni bawk. Lei awm dan leh water-ice distribution bakah a leilung 'material composition' zirchiannate an nei dawn. Ionosphere an teh dawn a, sik leh sa awmdante pawh an zirchiang dawn a ni.

Kan Solar System-a planet pariat zingah hian Sikeisen leh Khawvel physical leh chemical property-te chu a inhnaih ber niin mithiamte chuan an sawi. Axial tilt leh rotation period inang an neih avangin ni leh zan rei zawng bakah season inthlak dante pawh a inang thuak a ni. 

Hetiang hi ni mah se Ni (sun) a hel dan a dang deuh a, ni 687 chhungin vawi khat a hel hman chauh a, Sikeisen kum khat leh khawvel kum hnih a inhen vel. 

Hmasanga China hunlai kha chuan Sikeisen hi 'Yinghuo' tiin an ko a, chumi awmzia chu 'luminous fire' tihna a ni. Chinese emperor-te khan an ngaihsak hle a, Mars chet dan danglam leh chhiatna thleng ṭhinte pawh an sawi zawm fo ṭhin a, dynasty inthlak danah leh an emperor-te thih dan nente pawh an sawi zawm bawk ṭhin.

v    Mars mission hi 44 tirh chhuah a ni tawh a, 24 chu a hlawhtling. Tunah hain Mars orbit leh leilungah hian zirchianna pariat kapui mek a ni. 

v    Mars hi Khawvel aṭangin km maktaduai 400 vela hla a ni.

v    Mars soft landing hi US chiahin hlawhtling takin an la kalpui.

v    China hian kum 2011 khan Kazakhstan aṭangin Mars zirchiang tur hian spacecraft a lo kapchhuak tawh a, mahse a hlawh­tling lo a, spacecraft hi boruakah a kang zui a ni. 

v    Tianwen-1 hming awmzia hi  'Questions to Heaven' tih a ni a, Kum 340-278 BC hunlai vela Chinese poet hmingthang Qu Yuan poem aṭanga lak a ni.