Seoul-a Halloween Hmannaa innekbuainaah mi 153 an thi

South Korea khawpui, Seoul-a Inrinni zana Halloween hmannaa innekbuaina thlengah mi 153 an thi a, hliam tuar mi ṭhahnem tak an awm bawk.

Innekbuaina thlenga thi zinga tam zawk hi tleirawl leh kum 20 bawrte an ni a, ram dang mi 20 an tel bawk. Hliam tuar zinga mi 19-te chu an dinhmun a ṭha lo hle.

President Yoon Suk-yeol chuan nimin kha ram pumah vanduaina thlenga thite sunna hun atan a puang a, hnam puanzarte a ngul chanveah zar an ni.

Inrinni zan khan Seoul khawpuia Itaweon district-ah Halloween hmangin mi tam tak an pungkhawm a, hei hi Covid-19 len hnuah mask hman ngai loa Halloween event lian an hman ṭum khatna a ni. An ram huna zan dar 10 velah Hamilton Hotel bula alley-a pungkhawmte chu innekbuaiin, he vanduaina hi a thleng ta a ni. He thil thleng hi South Korea chanchina innekbuaina thleng rapthlak ber a ni.

An innekbuai chhan tak hi hriatchian a la ni lo a, tualchhung media ṭhenkhat chuan milar tak pakhatin an awmkhawmna bula bar a tlawh tih thawm a awm a, bar lam pana mi tam tak an tlankhawm avanga thleng niin an tarlang.

Itaweon district-ah hian nightclub leh bar a tamin, ṭhalaiten zan lam hun an hmanna hmun lun tak a ni. Krismas leh hunpui dangah pawh ṭhalai tam tak pungkhawmin an lawm ṭhin a ni. Mahse Inrinni zana pungkhawm hi ṭum danga pungkhawm ṭhin aiin a let eng emaw zatin an tam niin a hmuna telte chuan an sawi.

Innekbuaina a thlen hnu hian chhanchhuah hna thawk turin emergency worker 800 chuang tirh an ni a, an zingah hian kangṭhelhtu mi 346 telin, hliam tuarte phurhna leh enkawlna tur motor 140 tirh nghal a nih thu official-te chuan an sawi a ni.

Seoul khawpuia vanduaina rapthlak tak thleng vang hian South Korean tech and mobile game firm-te chuan Halloween tihlarna an tihchhuahte chu an titawp nghal a, amusement park Everland-ah pawh Halloween themed event buatsaih chu ṭhulhin, regional government leh organisation hrang hrangte chuan festival an buat­saihte an titawp bawk.

President Yoon chuan vanduaina thlen hnu hian emergency ko nghalin, thil thlen dan chu uluk taka chhui chiang turin thupek a tichhuak. Thi chhungte a tuarpui thu leh, hliam tuarte an ṭhat leh thuai a duhsak thu a sawi rualin, "Seoul khawpui laili laiah hetiang hi thleng tur a ni lo," tiin a thlen nawn tawh lohna tura uluk taka hma lak a ṭul thu a sawi.