Somalia-a car 2 puakah mi 100 chuang an thi

Somalia khawpui Mogadishu-a education ministry kawtah, Inrinni liam ta khan car pahnihah bomb puakin mi 100 chuang an thi a, 300 velin hliam an tuar.

President Hassan Sheikh Mohamud chuan, "Rawng taka thah zingah hian, nu nau pawm lai te, chhungkaw pa inentir tura chhuakte, an zirna chhunzawm tura zirlai chhuak te, harsa tak chunga sumdawnna kalpui hram hram te an tel," tiin nimina pawikhawihna thlenna hmun a endik hnuah a sawi.

Eng pawl mahin he tha­rum thawhna hi an tih a ni tih an la sawi lo a, President Hassan erawhin Islamist pawl, Al Shabaab extremist-te chu mawhphurtu niin a puh. Al Shabaab-te hi pawi­khawihna lian tham leh civil mi thih tamnaah te an lo inhnamhnawih fo tawh a, hengah te hian pawikhawihna chu an pawl thlen a ni tih erawh an sawi lang ngai lo thung.

President, prime minister leh senior official-ten firfiaka chetna, a bikin al-Shabab chung­thu an ngaihtuah ni takah Mogadishu-a pawi­khawih­na hi a thleng a ni. Al-Shabaab hi al-Qaida peng zinga pawl hlauhawm berte zinga mi niin, Somalia ram laili leh chhim lam an thunun mek avangin, US pawhin airstrike hmangin vawi tam an lo bei tawh a ni.

Bomb puak hmasa zawk hian education ministry building chu a fuh tel a, bomb pahnihna hi hliam enkawl tura ambulance-te lo thlen hnu leh hliam tuarte bawihsawm tura mi an punkhawm laiin a puak leh a ni.

Kum 2017, October thla khan helai hmunah vek hian, Somalia-a Zobe junction-a hotel lian, sorkar office, restaurant leh kiosks awmnaah bomb puak rapthlak tak hi a thleng tawh a, hei hi an ram chanchina bomb hmanga inbeihna lian ber niin mi 500 chuang zet an thi a ni.

President Mohamud chuan mitthi zat hi an pun chhoh zel a rin thu a sawi. Hliam tuar, dinhmun derthawng taka awm mekte enkawlna pe turin hnathawkte a hriattir nghal bawk.