Asia ram tlawh kual turin Donald Trump zin

US President Donald Trump chu ni 11 thanga Asia ram hrang hrang tlawhkual turin a zinchhuak.

President Trump hian Japan tlawh hmasa berin, nimin khan Tokyo bul Yokota air base-a US leh Japan sipaite hun a hmanpui. Trump chan tu sorkar leh dictator mahin US theihna chu an hmuhniam tur a ni lo, a ti. Nimin vek khan Japan Prime Minister Shinzo Abe nen Tokyo-a Kasumigaseki Country Club Gold Course an khel dun a, hemi hma hian chaw chhun kildunin an inkawm bawk a ni. Hruaitu pahnihte hian North Korea chungchangte an sawidun a ni. Seoul-a US military complex, Camp Humphreys a tlawh bawk a ni.

Trump hi kum 25 chhunga US President Asia ram tlawhkuala zinchhuak rei ber tur a ni a, ni 11 chhung hian Japan, South Korea, China, Vietnam leh Philippines a tlawh ang. President Donald Trump-a hi a nupui, Melania leh sorkar mi pawimawh eng emaw zatin an zui a ni.

Japan a pan dawn hian President Trump hian Hawaii tlawhin, Pearl Harbor-a USS Arizona Memorial chu a tlawh hmasa a ni. Hei hi Indopui 2-na hun lai, kum 1941-a Pearl Harbor-a Japan-in US indo lawng a kah pilna hmun a ni.

Trump hian November 7-ah South Korea panin, SKorea president Moon Jae-in nen an inkawm dawn a, National Assembly-ah thu a sawi bawk ang.

November 8-ah Vietnam a pan ang a, Da Nang-a Asia-Pacific Economic Co-operation (Apec) summit a hmanpui dawn a ni. November 11-ah Vietnam khawpui, Hanoi-ah kalin President Tran Dai Quang leh Vietnam hruaitu dangte a kawm ang.

November 12-ah Philippines a pan dawn a, Association of Southeast Asian Nations (ASEAN) 50th anniversary puala zanriah buatsaih a kilpui dawn a ni. Manila-ah ASEAN summit neih chu hmanpuiin, President Rodrigo Duterte nen an inkawm dawn a ni.