Libya-a hel pawlin comic book convention khar sak

Libya rama helpawl pakhat, Special Deterrent Forces (SDF) chuan an ram khawpui Tripoli-a comic book convention buatsaih chuan an ram kalphung a palzut nia sawiin an khar sak.

SDF chuan convention huaihawtute an man tih an sawi. Convention neihnaa thlalakte chu social media lama thehdarh niin, hei hi mipuite'n an sawisel nasat avangin an kharsak niin an tarlang. SDF hi UN thlawp, Government of National Accord thlawptute an ni.

Tripoli-ah hian Zirtawpni aṭang khan Comic Con festival ṭum hnihna hi buatsaih a ni a, ṭhalai tam tak an tel a ni. Mahse an thil kalpui dan hi duh loin, Islamic pawl SDF hi a inrawlh ta a ni.

Convention buatsaihtute chuan SDF chetdan chu an dem thu sawiin, mi ṭhenkhat an man bakah kutthlakte pawh an nei niin an sawi. SDF hian Libya chu Muslim ram a ni a, zalen taka thiltih an remti lo tih an hrilh niin an sawi bawk.