Catalan hruaituin lungrual turin mipuite ngen

Catalonia regional government president hlui, Carles Puigdemont chuan Catalan mipuite leh party hrang hrangte chu Spain laka independence nawr chhunzawm zel tura lungrual taka hma la turin a ngen.

Catalan president aṭanga ban a nih hnuah Puigdemont hi Belgium-ah a tlanchhia a, tun thlengin Belgium khawpui, Brussels ah ala awm a, a minister hlui pali pawh an awm bawk. Spain roreltute chuan Puigdemont manna tur thupek hi an tichhuak tawh a ni.

Carles Puigdemont leh a minister hluite hi sorkar laka hel leh Catalan independence puanna tur sorkar sum dik lo taka hmangah puhin thubuai siamsak an ni a, hetihlai hian Catalan hruaitute laka thubuai siamsak duh lo hian Catalonia bial khawpui hrang hrangah mipuite'n lungawi lohna an lantir a ni.

Puigdemont chuan a chungthu dik taka ngaihtuah a ni ang tih intiamkamna a dawn hma chuan Spain-ah kir a tum lo tih a sawi. Hei bakah hian December 21-a local election neih tura chuh a tum thu sawiin, ram pawn lam aṭangin a campaign mai dawn niin a sawi. Mahse Catalonia leh Spain sorkar chuan politician thiam loh chantirte chu inthlanah hian an chuh thei dawn lo tih an sawi thung.

Spain central bank, Bank of Spain chuan Catalonia bial buaina hi a la kalzel a nih chaun ram pum sum dinhmun thlengin a nghawng na dawn hle niin a sawi. Bank-in Financial Stability report a tihchhuahah, Catalonia bial buaina avang hian Spain chuan euro tluklehdingawn 27 thleng a hloh thei dawn niin a sawi.

Catalonia-in Spain aṭanga independence a puan chuan tourism leh investment lamah pawh nghawng a nei tawh a, company 2,000 vel chuan Catalonia bial chhunga an headquarters chu ramchhung hmun dangah an sawn tawh a ni. Heng company-a thawktu zinga 30% chuang chu Catalan mi an ni. Catalan tax authority chuan buaina hi a kal zel chuan kum 2018-a gross domestic product (GDP) chu 0.7–2.7 % velah a tla thla dawn niin a sawi a, hei hian Spain ram puma growth rate a tihhniam phah dawn hle a ni.