Brazil President thlannaah Lula a chak Bolsonaro-a'n a chak loh a la pawm lo

Brazil President thar tur thlanna thawh hnihna, Pathiannia neih takah leftist leader, President hlui Luiz Inacio Lula da Silva chuan President nilai, Jair Bolsonaro a hneh.

Supreme Election Court (TSE) chuan President thlannaah hian Lula chu chaka puangin, vote tla aṭangin 50.9% a hmu tih a sawi. Bolsonaro chuan vote 49.1% a hmu a, nimin khan a chak loh hi a la pawm lo tih sawiin, result hi chhiar nawn leh a phut maithei nia sawi a ni. Bolsonari hi Brazil President thlannaah President ṭanglai zinga chak lo hmasa ber a ni.

TSE-in an chak thu a puan hnua amah thlawptu hmaa thu a sawiah, Lula chuan hnehna changtu chu Brazil mipuite an ni tiin, amah emaw, Workers' Party hnehna chan emaw a ni lo,a ti.

Brazil ram tihdan phungah chuan inthlan result puanah hian candidate chak loh zawk hian a chak loh a pawm thu sawiin a ṭawngchhuak hmasa ṭhin. Mahse inthlan result puan a nih hnuah Bolsonaro hian engmah a sawi lo a, Lula pawh a lawmpuina thu a hlan lo. Nimin thleng khan Bolsonaro hian mipui hmaa sawi a la nei lo.

Kum 77 mi, Lula hi kum 2002-2010 chhung khan Brazil President a lo ni tawh a, mahse state oil company, Petrobras tana contract pek chungchangah Brazil construction company hnen aṭanga thamna sum dawnga puh a nih avangin kum 2018 khan thiam loh chantirin jail-ah a tang a ni. Hei vang hian kum 2018 President thlanna pawh a chuh phalsak a ni lo. Ni 580 zet jail-a a tan hnuah thiam loh chantir a nihna chu tihtawp a ni a, politics lamah a rawn kir leh ta a ni.