Black Sea deal aṭangin Russia inhnukdawk
Russia chuan kar liam ta kartawp khan Black Sea deal aṭangin tiam chin awm loa a inhnuhdawh thu a sawi a, hei hian khawvel huapa food supply a nghawng thei dawn a ni.
Russia foreign ministry chuan Black Sea Grain Initiative kalpuina tur siam anga inlanin, Ukraine sipaite chuan Britain navy specialist-te kaihhruaina hnuaiah Sevastopol-a Russian Black Sea Fleet lawngrual leh infrastructure-te chu drone hmangin an bei niin a puh. Mahse Ukraine leh Britain chuan Russia puhna hi an pha thung.
Russia lawngte beih an nih avangin Black Sea Grain Initiative atana civilian lawng, bungraw phur tur tirh chu an ngam tawh lo nia sawiin, Russia chuan inremna an siam aṭang hian a inhnukdawk tih a sawi a ni.
Inremna aṭanga Russia inhnuhdawh hian Africa leh Middle East-a thawn tur wheat ton sang tel an lo book tawh dinhmun pawh a chiang thei ta lo a, hei bakah hian Ukraine aṭanga Europe-a vaimin thawnchhuah tur pawh a nghawng tel dawn bawk.
UN kaihhruaina hnuaia grain deal siamah hian UN, Turkey, Russia leh Ukraine official-te chuan Black Sea-a bungraw phur lawng kaldan leh an thil phurh enfiah ṭhin turin inremna an siam a ni.
Kumin July thla aṭang khan Black Sea aṭang hian wheat, vaimim, barley, rapeseed leh soy ton maktaduai 9.5 chuang thawnchhuah a ni tawh.