Israel ramin Parliament inthlanpui nei leh

Israel Parliament inthlan chu nimin khan neih a ni leh a, kum thum leh a chanve chhunga inthlanpui an neih ṭum ngana a ni.

Parliament seat 120-a inthlan neihah hian majority nei phak an awm a rinawm lo leh hle a, ṭangrual sorkar a din leh ngei rin a ni.

Nimin zing dar 7 aṭangin vote thlak ṭan a ni a, an ram huna zan dar 10 thleng vote thlak hun hi hawn a ni. Tun ṭum inthlanah hian PM hlui, eiruk thubuai nei mek Benjamin Netanyahu pawhin chuh lehin, inthlan hmaa mipui ngaihdan lakah a kaihhruai Likud party chu seat la hnem ber tura ngaih a ni a, mahse party mala sorkarna siam tura seat ngai zat, seat 61 erawh an lak phak a rinawm loh thung.

Israel prime minister hlui Naftali Bennet kaihhruai ṭangrual sorkar thlawptu ṭhenkhat an inhnuhdawh avangin June thla khan Parliament ṭhiah a lo ni tawh. Caretaker PM atan Yair Lapid a awm mek a ni. Lapid-a kaihhruai Yesh Atid party chu seat la hnem ber dawttu tura rin an ni.

Inthlan result hi vawiinah puan chhuah hman beisei a ni a, mahse party mala sorkar siam thei an awm loh chuan ṭangrual sorkar din turin party-te an indawr kual ang a, hun a la duh deuh rin a ni. Inthlanpui neih hmasak paliah party mala sorkarna siam thei an awm lo vek a, ṭangrual sorkar din ni ṭhin mah se an lungrual tawk loh ṭhin avangin sorkar ngelnghet a ding thei lo a, reiloteah sorkar hi a tluchhe leh ṭhin a ni.