Russia-in missile hmangin Ukraine a bei leh Ukraine-in G20 aṭanga Russia hnawtchhuak turin ngen

Russia chuan Thawhṭanni khan missile hmangin Ukraine ram chhung hmun hrang hrang a bei leh a, energy facility-te a bitum nia sawi a ni.

Ukraine prime minister Denys Shmyhal chuan Russia hian Ukraine region 10 beiin, heng hmuna energy facility 18-te an kapchhia niin a sawi. Central Ukraine-a Kermenchuk-a hydroelectric power plant pawh beih tel a ni a, mahse an kap chhe tel tih erawh sawichian a ni lo.

Ukraine khawpui, Kyiv mayor Vitali Klitschko chuan khawpui chu ṭum 10 zet kah a nih thu sawiin, khawpui chhung hmun ṭhenkhatah electricity leh tui supply pawh a chhia tih a sawi. Mahse hengte hi siamṭhat leh thuai an ni, a ti. Kharkiv mayor Ihor Terekhov pawhin an khua chu missile pahnih hmanga kah niin, infrastructure pawimawhte an rawn bitum tih a sawi ve bawk. Chhim lama Odesa leh Zaporizhzhia-a hydroelectric power plant-te pawh beih tel an ni bawk.

Russia hian tun hnaiah a beihpui thlak hi ngawrh zawka kalpui lehin, missile hmangin Ukraine ram hmun hrang hrang a kap a ni.

Ukraine foreign ministry thupuangtu Oleg Nikolenko chuan Russia chu Group of 20 aṭanga hnawhchhuah an phut thu sawiin, December thlaa Bali-a G20 summit neiha tel tura Russia president Vladimir Putin sawm a ni ve pawh chu sut leh turin an phut tih a sawi bawk. Nikolenko chuan Putin kutah chuan pawisawilo mi tam tak thisen a kai a, hei vang hian khawvel ram hruaitute bula a awm ve phalsak a ni tur a ni lo, a ti. Putin chu Ukraine civil mite leh energry infrastructure bei tura thupek petu hi mipuiten an hre vek a ni, tiin a sawi.