Tehran-a nawrh huaihawt chungchangah Sorkarin mi 1,000 te thubuai a siamsak

Iran sorkar chuan an ram khawpui, Tehran-a sorkar laka lungawi lohna lantira nawrh huaihawt chungchangah mi 1,000 te thubuai a siamsak.

Tehran-a nawrh huaihawtnaah hian buaina chhuakin, bungruate suasamin motor-te an hal bawk. Chief prosecutor chuan heng pawikhawihna thleng kaihhnawihah mi 1,000 te hi thubuai siamsak an ni a, tun kar chhungin an chungthu ngaihtuah a ni ang, a ti.

Hijab dan hmang ṭha lo tia puh avanga Iran police-ten an man, kum 22 mi Mahsa Amini-i chu chu police-te kuta a awm lai, September 16-a a thih avangin ram chhung hmun hrang hrangah lungawi lohna hi lantir a ni. Khawpui hrang hranga nawrh huaihawtnaah hian mi tam tham tak man an ni tawh a, thuneitute lam chuan an mi man zat hi tarlang lo mah se, rights activist-te chuan mi 14,000 an man tling tawh niin an sawi.

A tir lamah chuan Iran-in an rama hmeichhiate pawnchhuahnaa an lu tuamna, hijab hmang ngei tura a phut chungchang duh lohna hi lantir ni mah se, a hnuah nawrh huaihawt hi punlun zelin, sorkar laka an lungawi lohna hrang hrang lantirna atan an hmang zui tawh a ni. Hetih lai hian sorkar chuan ram chhunga lungawi lohna leh buaina chhuakah an hmelma, ramdang sorkar an inrawlh niin a puh.

Iran Human Rights Activists News Agency (HRANA) chuan sorkar laka lungawi lohna lantir a nih chhoh hnuah, security force-te kutah mi 284 an thi tawh a, an zingah hian naupang 45 an tel niin a sawi. Nawrh huaihawt leh security force-te intihbuainaah security force 35 an thi tawh bawk a ni.