UNSC-in Rakhine state buaina titawp turin phut

United Nations Security Council chuan Thawhṭanni khan New York-a UN headquarterse-ah Myanmar ramchhung dinhmun ngaihtuahin meeting a nei a, Rakhine state-a sipaite'n civil mite chunga beihpui an thlak mek chu titawp turin an phut.

Meeting zawh hnuah thuchhuah an siamah, UNSC chuan Myanmar sorkar chu Rakhine state-a a sipaite chetna titawp tura an phut thu te, dan kengkawh a, human rights humhim tura hma la nghal tura an phut thu te an tarlang. Hei bakah hian tualchhung buaina chhuak vanga Bangladesh rama tlanchhia, raltlante Myanmar rama him taka hruaikir an nih leh theih dan tur ruahmanna siam turin an phut bawk.

Council chuan mipat hmeichhiatna lam hawia pawikhawihna thleng ṭhin chu veng tur leh, pawikhawihtute pawh hrem ngei tura an phut thu a sawi. Myanmar sorkar chu Bangladesh sorkar leh UN te ṭha taka thawhpui a, raltlan zawng zawngte hruaikir an nih leh theih dan ngaihtuah leh phalsak turin a ti.

Security Council chuan August 25 aṭanga Myanmar sipaiten Rohingya helpawl, Arakan Rohingya Salvation Army laka beihpui an thlaknaa civil mi tam tak tawrhna thleng chu an dem thu a sawi. Sipaite beihpui thlak hnu hian Rohingya 607,000 chuang chu Bangladesh ramah an tlanchhe tawh a ni.

Rakhine state-a buaina chhuak chu a bulṭhut aṭanga chinfel dan kawng zawng turin Myanmar sorkar chu an phut a, chi leh sakhaw inthliarna te kalpui lo tura phutin, mipuite zalen taka an chet vel phalsak tur te, sorkar enkawlna pawh ang khata dawng vek tur te, khua leh tui dik tak nih theihna tura dilna pawh rualkhai taka kalpui turtein an phut tih Security Council chuan a sawi. Myanmar sorkar hnuaia peng hrang hrangte chu UN Secretary General hlui, Kofi Annan-a kaihhruai Advisory Commission on Rakhine State-in Rakhine buaina chinfelna leh hmasawnna tura kawnga rawtna a siamte a taka kalpui a nih theihna tura lungrual taka thawkho turin an phut bawk a ni.

Security Council chuan Myanmar dinhmun chu a thlithlai zui zel dawn tih sawiin, UN Secretary General Antoni Gutteres hnenah ni 30 hnuah Rakhine dinhmun report pe tura an ngen thu an thuchhuahah an tarlang bawk.