Donald Trump-an SKorea a thleng

Asia ram tlawhkual tura zin chhuak mek, US President Donald Trump chuan Japan ram a tlawh hnuah nimin khan South Korea a thleng.

President Trump hian nimin zing khan Tokyo aṭangin Seoul a pan a, South Korea foreign affairs minister Kang Kyung-wha-in alo dawngsawng a ni. Trump hian US-South free trade agreement kalpui danah ruahmanna thar siam a duh thu alo sawi tawh avangin ram pahnihte insumdawn tawnna chungchang chu thuneitute a sawipui dawn a, hei bakah hian North Korea chungchang pawh an ngaihtuah ber tura ngaih a ni.

Trump hian SKorea President Moon Jae-in a kawm bakah, US sipaite awmte leh local politician-te a hmu bawk a ni. SKorea-ah hian darkar 24 chhung chauh a awm dawn a, China, Vietnam leh Philippines te a tlawh leh dawn a ni. Trump leh Moon-te hi September thla khan New York-a UN General Assembly neihnaah an lo inhmu tawh a ni.