Thlipui tleh vanga thi 61 tling tawh

Vietnam rama thlipui, typhoon Damrey tleh vanga thi chu mi 61 an tling tawh.

Typhoon Damrey hian ruah a ken tel avangin hmun ṭhenkhatah tui lian a nasa in, lei a min nasa hle bawk. Chhiatna hi an ram chhim leh ram laili biala awmten an tuar nasa ber a ni.

Official-te chuan thlipui tlehin chhiatna a thlen vanga thi chu mi 61 an tling tawh a, chin hriat lohin mi 20 chuang an awm bawk niin an sawi. Chin hriat loha awmte zawn hna hi thawh mek a ni. Ruah a la sur chhunzawm reng avangin hmun ṭhenkhat chu tuilian hian ala chim a, chhanchhuah hna thawhna kawngah pawh harsatna a siam a ni. Thuneitute chuan thi zat pawh hi an la punchhoh an rin thu an sawi.

Tuilenna biala cheng mi 30,000 chu hmun him lamah sawnchhuah an ni tawh a, hotel-a thleng khualzinte pawh lawng hmangin hruaichhuah an ni bawk.

Thla hmasa khan Vietnam hmar lam leh lailai laiah hian tuilian leh leimin nasa tak vangin mi 70 chuang an lo thi tawh bawk a, September thla khan typhoon Doksuri tleh vangin mi 11 an thi bawk a ni. Kumin chhungin tuilian leh leimin thleng vangin mi 240 zet chin hriat lohin an awm tawh bawk. Leilung chhiatna thleng vangin kum 20 kalta chhungin Vietnam ramah hian mi 13,000 chuang an thi tawh a ni.