Korea ram 2-te Missile hmangin an in ralsai

North Korea leh South Korea ramte chu nimin zing khan missile hmangin an inralsai.

North Korea chuan missile hi kapchhuak hmasa in, heng zinga pakhat chu South Korea-a Sokcho khawpui aṭanga km 60 vel chauha hla tuipuiah a tla a ni. Hei hi South Korea lam chuan chhang ve nghalin, air-to-ground missile pathum a kap chhuak a, heng missile-te hi North Limit Line (NLL) chhim lam tuipuiah an tla a ni.

NKorea chuan SKorea leh US-ten joint military drill an chhunzawm zel a nih chuan a man an tèl ngei dawn tih sawiin Thawhlehni khan a lo vau tawh bawk. Nimin khan missile hi khawchhak leh khawthlang lamah 17 vel a kapchhuak niin SKorea official-te chuan an sawi. SKorea president Yoon Suk-yeol chuan NKorea chetdan chu a dem thu leh, na taka an chhan let zel tur thu a sawi a, hemi hnu hian South lam hian missile pathum hi an kapchhuak zui ve leh nghal a ni.

North lam missile kahchhuah zingah hian short-range ballistic missile a tel niin South Korea Joint Chief of Staff (JCS) chuan a sawi. NKorea missile kahchhuah avang hian Ulleungdo-ah mipuite inralring tura hriattirna siren pawh tihrik niin, an hnaih leihnuai lama inhumhimna siamah insaseng tura hriattir an ni.

East Sea lam, Sea of Japan tia sawi ni bawka air-route ṭhenkhat pawh a khar hman a ni. Local airline-te pawh Japan leh US lama kal tur khualzinte himna atan an thlawhtheihna kawng pawh thlak turin an hrilh bawk.