Bolsonaro-a'n ram danpui a zah tur thu a sawi

Brazil President thlanna neih zawk taka chak zo ta lo, President ṭanglai Jair Bolsonaro chuan inthlanah a chak loh a pawm thu hi tun thlengin a la sawi lo a, mahse an ram danpui chu a zah tur thu a sawi.

Inthlan result puan hnuah, Brazil ram tihdan phungah chuan candidate chak lo zawk hian thu sawi hmain a chak loh a pawm thu an sawi ṭhin. Mahse Bolsonaro hian inthlana Luiz Inacio Lula da Silva a hneh loh hnuah thu engmah a sawi lo a, Lula lawmpuina pawh a hlan zui lo bawk. Inthlan result hi a pawm dawn lo tia sawi thawm hi awm loin Thawhlehni khan Bolsonaro chuan an ram danpuiin kaihhruaina a siamte a zah tur thu leh a zawm tur thu a sawi a, mahse a chak loh a pawm tih erawh a sawilang chuang lo a ni.

"Democracy zah lo leh ngai pawimawh lo ah puh ka ni fo. Mahse min puhtute ang lo takin, kei chuan kan ram danpui hi ka zah a, Constitution-a kaihhruaina siamte chu ka zahin ka zawm zel dawn a ni," a ti. President atana thlan thar, Lula kaihhruai sorkar a din theihnan thuneihna hlanchhawnna tur pawh buaipui mek a ni tih a chief of staff Ciro Noguiera chuan a sawi.

Pathiannia Brazil President thar tur thlannaah candidate pahnihte hi an inthlau lo hle. Thlan tlin ni ta, Lula chuan vote tla aṭangin 50.9% hmuin, Bolsonaro hian 49.1% a hmu thung a, Brazil President ṭanglai zingah inthlana chak lo hmasa ber a ni.