Myanmar Court-in NLD MP hlui kum 173 tang turin hrem

Myanmar sipai sorkar hnuaia court chuan civil sorkar paihthlak taka National League for Democracy (NLD) party MP hlui, Win Myint Hlaing chu kum 148 tang turin a hrem. A hmaa hremna a pek tawh nen kum 173 a tang dawn a ni.

Kum 52 mi, Win Myint Hlaing hi firfiak zawnga chea puhna thubuai pariatah thiam loh chantir a ni. Kum 2021, February thlaa sipaiten civil sorkar paihthla a, thuneihna an hnehchhuh hnuah, NLD party hruaitu leh civil sorkara official eng emaw zat chu manin thubuai siamsak an ni.

Win Myint Hlaing hi kumin March, April leh June thla khan sipai sorkar duh lohna lantira buaina chawh chhuahnaa inhnamhnawih leh, firfiak zawnga chea puhna thubuaiahte thiam loh chantirin, kum 25 tang turin hrem a lo ni tawh bawk. Hetih lai hian Hlaing thiam loh chantir a nihna thil thleng ṭhenkhat hi jail-a a tan hnua thlengte nia sawi a ni bawk.

Myanmar sipai sorkar chuan July thla khan firfiak zawnga che leh sipai dodalna lantirtua puha thiam loh chantir, political activist palite chu a lo tihlum tawh a ni.

NLD chuan sipaiten thuneihna an chan hnuah an party official leh member 917 man an ni tawh a, ṭhenkhat chu chhuah zui leh nghal mah se, tunah hian mi 701 chu hren mek an la nih thu a sawi. NLD hotu lu ber, Aung San Suu Kyi-i pawh sipaite hian a la hreng zui zel a, thubuai eng emaw zat siamsak tawhin an puhna ṭhenkhatah thiam loh chantirin kum 26 tang tura hrem a ni tawh bawk. Hetih lai hian sipai sorkar hian Suu Kyi-i hi thubuai a siambelh sak zel a ni.