Pakistan sum dinhmun siamṭhatna turah China-in a pui zel ang : President Xi

China president Xi Jinping chuan sum lama harsatna tawk mek, Pakistan-in an ram sum dinhmun siamṭhatna tura a hmalaknaah China chuan a pui zel dawn tih a sawi.

Pakistan hian leiba tam tham tak neiin an ram sum dinhmun a chhe hle. Hetih mek lai hian kumina tuilian nasa tak an tawrhah khan USD tld 30 vel a chân leh bawk a ni. Tuilian vang hian mi 1,700 chuang an thi.

Pakistan prime minister Shehbaz Shariff-a chu ni hnih chamin China ramah a zin a, president Xi Jinping nen Beijing-a Great Hall of the People-ah an inkawm a ni. President Xi chuan Pakistan ram chu an thlawp zel tur thu hrilhin, ram pahnihte chuan USD tld 60 hu infrastructure project, China-Pakistan Economic Corridor (CPEC) siamna kawngah an thawhdunna an tihngheh zel a ṭul thu a sawi. China hi Pakistan rama mining leh infrastructure project lian kalpuina eng emaw zatah a tel a ni.

President Xi chuan tuilian tuarte an lainat thu sawiin, khuarel chhiatna thlengin thil a tihchhiat hrang hrangte din tharna turin Pakistan chu an theih anga an puih tur thu a sawi bawk.