Pakistan PM hlui Imran Khan kap hliam

Pakistan prime minister hlui Imran Khan chu nimina rally an neihnaah silai kengin a chuanna motor beiin, a ke ah kah hliam a ni.

He pawikhawihna thlenna hi Pakistan khawpui, Islamabad aṭanga km 200 vela hla, Punjab province khawchhak lam, Wazirabad-a Zafar Ali Khan Chowk-ah a ni. Sorkar laka lungawi lohna lantir a, inthlanpui buatsaih phûta Islamabad khawpui pana motor-a kawngzawhte chu Imran Khan hian a ho a ni.

Kum 2007 khan Pakistan prime minister hlui Benazir Bhutto chu rally a neihnaah kahhlum a lo ni tawh bawk.

Imran Khan leh mi dang ṭhenkhat chuanna truck chu silai keng hian a pawngkah a, mi dang pakuain hliam an tuar bawk a ni. Hliam tuar zingah hian Imran Khan-a party, Pakistan Tehreek-e-Insaf (PTI) senator Faisal Javed pawh a tel. Report ṭhenkhat chuan thi pakhat a awm niin an tarlang. Silai hmetpuaktu hi man a ni tawh a, a nihna erawh puanzar a la ni lo. Eng pawl mahin he thil thleng hi an tih a nih thu an la sawi lo bawk.

Pakistan interior ministry chuan rally neihnaa pawikawihna thleng hi chhui chiang turin sorkarin thupek a tichhuak nghal tih a tarlang.