Trump-an North Korea a vau

US President Donald Trump chuan South Korea parliament-a thu a sawiah, North Korea vauna thu a sawichhuak.

President Trump chuan North Korea chu US enhniam lo tur leh, enchhin tum lo turin a ti. North Korea hotu, Kim Jong-un chungchang pawh sawiin, ralthuam a lakkhawmte chuan an ram a tihhim phah lo a, dinhmun ṭha lo zawkah a dah a ni tih sawiin, ram hrang hrangte chu NKorea nuclear programme kalpui mek tihtawp tura thawkho turin a sawm bawk.

Asia ram panga tlawhkual tura zinchhuak, President Trump hian Thawhlehni khan South Korea a tlawh a, President Moon Jae-in nen an inkawm bakah parliament-ah thu a sawi a ni.

Trump chuan NKorea founder leh Kim-a pu, Kim Il-sung chungchang pawh sawichhuakin, NKorea chu Kim-a puin a mitthla leh a duhthusam ang ram a ni lo tih a sawi. Hemi rual hian pawikhawihna hrang hrang thlen mah se, Kim chu insiamṭha a, an ramin dinhmun ṭha zawk a neih theihna turin hun an la pe thei tih a sawi bawk.

Korean pensinsula-a US sipai tam tham tak, aircraft carrier leh fighter jet dah a nihna chhan chu muanna an duh vang niin US President chuan a sawi. Hemirual hian NKorea ram thlawp ṭhin, China leh Russia-te chu economic lama NKorea nena an inzawmna neihte titawp tura a duh thu a sawilang.

Trump hian nimin zing khan Korean demilitarized zone tlawh a tum a, mahse chhum a zin nasat avangin a chuanna helicopter chu a ṭum thei lo a ni. White House Press secretary Sarah Huckabee Sanders chuan president hian DMZ a tlawh thei ta lo chu pawi a ti hle tih a sawi.

President Trump hian nimin khan China a pan nghal a, Vietnam leh Philippines te a tlawh leh dawn bawk a ni.