Kabul-a TV station bei

Afghanistan khawpui, Kabul-a television station, Shamshad TV chu Thawhlehni khan firfiakten an bei a, security guard pakhat thatin, staff-te an pawng kah bawk.

Islamic State (IS) firfiak chuan TV station beitu an nih thu an sawi.

Shamshad TV hi private Pashto-language broadcaster a ni a, national stadium bula awm a ni. TV station beitute hi police angin an inthuam a, hand grenade te an tipuak a ni. Security force-te'n nen darkar hnih vel an inkap zui a, firfiak zinga pakhat chu kaphlumin, pakhat dang an kap hliam bawk.

Taliban firfiak pawl chuan TV station beihnaah hian inhnamhnawihna an neih loh thu an chhuah ve nghal a ni. Nikum khan Taliban firfiak pakhat chuan Afghanistan-a private television station lian ber, Tolo-ah thihchilh bomb tipuakin mi pasarih an thi a ni. May thla khan IS chuan Afghanistan khawchhak lam, Jalalabad khawpuia state broadcaster RTA an lo bei tawh bawk.

TV station beih anih vang hian Shamshad TV chuan darkar hnih chhung a programme tihchhuahte a titawp a, mahse darkar hnih hnuah dan pangngaiin a tihchhuah chhunzawm leh nghal a ni.