NATO-in Afghanistan-ah sipai dahbelh dawn

NATO chuan Afghanistan-a training mission hnuaia sipai a dahte chu 3,000 in tihpun a tum.

NATO secretary general Jens Stoltenberg chuan Brussel-a news conference a neihah Afghanistan-a sipai dahbelh an tum thu hi a sawi. Tunah hian Nato sipai hi 13,000 an awm mek a, 16,000 ah tihpun an ni dawn ta a ni.

Stoltenberg chuan sipai dahbelhte hi indonaah tirh an ni dawn lo a, NATO mission Resolute Support hnuaiah Afghanistan sipaite training leh thurawn pe tura dah an ni dawn tih a sawi. NATO chuan Afghan national security force-te chu sum leh hmanrua hmangin a pui chhunzawm zel dawn tih a sawi bawk. Stoltenberg chuan Pakistan-a firfiakte zalen taka an la awm chhunzawm zel chungchang pawh sawichhuakin, eng ram mahin a ram leilung chu inlakhran duhtu leh firfiakte zalen taka an awm theihna turin a siam tur a ni lo, a ti.

Resolute Support mission commander, US Army Gen John Nicholson chuan kumin February thla khan NATO sipai dahbelh an nih chuan Taliban leh Islam firfiak dangte beihna kawngah awmzia a nei thui dawn niin a lo sawi tawh a ni.