Karachi-ah Bank of China branch hawng

Bank of China (BoC) chuan Pakistan-a Karachi-ah branch thar a hawng.

BoC Chairman Cheng Siqing chuan Karachi-a branch an hawng thar chuan financial sector lama ram pahnihte thawhdunna a tichak sawt dawn niin a sawi a, he bank kaltlang hian Pakistan mipuite chuan China ram hausakna te an chhawr thei dawn a ni, a ti.

State Bank of Pakistan (SBP) Governor Tariq Bajwa chuan an rama foreign bank hrang hrang awm chuan ram economy lamah pawh nghawng ṭha zawk a thlen dawn niin a sawi a, Pakistan chuan BoC mithiamte hnen aṭangin small leh medium enterprise sector lam pawh an zirbelh thei dawn niin a sawi.

Karachi-a BoC branch hawnna-ah hian Pakistan-a Acting Chinese Ambassador Zhao Lijian leh Pakistan President Mamnoon Hussain te pawh an tel a ni. President Hussain chuan sorkar leh State Bank of Pakistan-ten BoC chu theihtawpin an thawhpui zel dawn tih a sawi. Zhao Lijian pawhin BoC in branch a hawng chuan Chinese corporate sector-in Pakistan economic dinhmun a rintawk zia a lantir a ni, a ti.

BoC hi Pakistan-a China bank hawn pahnihna a ni a, kumin May thla khan license pek a ni. Industrial and Commercial Bank of China (ICBC) chuan Karachi leh Islamabad-ah branch a lo nei tawh bawk a ni.