Israel inthlanpuiah Netanyahu leh a thawhpuite chak

Israel ram inthlanpuiah prime minister hlui, Benjamin Netanyahu-a kaihhruai ṭangrual pawl chuan hnehna an chang a, eiruk thubuai nei mek Netanyahu hi Prime Minister a ni leh thei dawn a ni.

Israel-ah sorkar nghet a ding mumal thei lo a, kum li leh a chanve chhungin inthlanpui ṭum nga an nei tawh a ni.

Inthlan result kimchang hi nimin khan puan niin, Netanyahu-a party, Likud Party chuan seat 120 awmna parliament, Knesset-ah seat 32 an la a ni. An thawhpui, ultranationalist party-te nen seat 64 lain, majority an nei pha.

Caretaker prime minister, Yair Lapdi-a party, Yesh Atid party kaihhruai ṭangrual pawl chuan seat 51 an la. Lapid hian an chak loh pawmin, Netanyahu chu lawmpuina a hlan tawh a ni.

President Isaac Herzog chu Netanyahu hi ṭangrual sorkar siam turin a sawm dawn a, President-in a sawm hnuah Netanyahu hian right-wing sorkar siam turin ni 42 hun pek a ni ang.

Israel chanchina Prime Minister ni rei thei ber niin, Netanyahu hian ṭangual sorkar siam tur hian hma a la ṭan nghal niin a sawi a, a thawhpui party-te nen hian chanvo insem dan turte an sawiho ang. Likud party thawhpui senior ber tur anti-LGBTQ party, Religious Zionism party chuan security portfolio chan an beisei nia sawi a ni.

Religious Zionism party hian seat 14 an la a ni. Likud party thawhpui dang, Shas chuan seat 11 lain, United Torah Judaism chuan seat 7 an la ve bawk.