Imran Khan-a'n lungawi lohna lantir chhunzawm zel tum

Pakistan prime minister hlui Imran Khan chuan rally an neihnaah silai hmanga beih a nih hnuah, sorkar laka lungawi lohna lantir chhunzawm zel a tum tih a sawi.

Ningani khan rally an neihnaah Imran khan chuanna motor chu silai kengin a bei a, mi pakhat a kaphlum a, Imran Khan hi a kap hliam a, midang eng emaw zatin hliam an tuar ve bawk.

Lahore khawpuia Shaukat Khanum hospi­tal-ah hruai a ni a, a ngaih­tuahawm lo niin a enkawltu doctor Faisal Sultan chuan a sawi.

Kum 70 mi, interna­tional cricket star hlui, Imran Khan hian an ram inthlanpui buatsaih phuta Lahore aṭanga Islamabad pana rally huaihawt chu a ho a ni. Ningania Wazirabad khawpui an tlan laia silai hmanga beitu hian a ke dinglamah a kap fuh a ni. Khan-a party, Pakistan Tehreek-e-Insaf party (PTI)-a senior leader Fawad Chaudhry chuan he thil thleng hi Imran Khan thah tuma beihna ngei a ni, a ti.

Pawikhawihna thleng vang hian PTI rally neih mek hi Ninga­ni tlai lam aṭang khan chawlh a nih hnuah, nimin chawhma dar 11 khan Wazirabad aṭangin an chhun­zawm leh nghal a ni.