Myanmar sipaiten civilian jet fuel tur lakpen sak : Amnesty
Amnesty International chuan Myanmar sipai sorkar chuan civilian jet fuel tur thawnluh chu sipaite hman turin a lo lakpen sak nia sawiin, ram dangte hnenah Myanmar sipaite tan thlawhtheihna fuel thawn titawp turin a ngen.
Ningania thuchhuah a siamah, Amnesty International chuan fuel company-ten civilian aircraft hman tura fuel an thawn ṭhin chu sipaite hian lo la pengin, an ram chhunga civil mite laka thlawhtheihna hmanga beihpui a thlakna atante a hmang zui a ni, a ti.
Sipaiten aviation fuel an lo lakpen zel avangin supplier, shipping agent, lawng neitu leh thuneitu dangte chu Myanmar ramah thawn tawh lo turin a ngen. Sipaiten lo pawhpen tur an nei hloh a, thlawhtheihna tui an thun theih loh chuan, civil mite bei turin an thlawk chhuak dawn lo a ni, tiin an thuchhuahah an tarlang.
Amnesty chuan zirchianna an neihah, kum 2021 March aṭanga kumin August thla inkar chhung khan, Kayah, Kayin, Chin state leh Sagaing region-ahte sipaite hian thlawhtheihna hmangin civil mite ṭum 16 an bei a ni, a ti. Heng beihpui an thlaknaah hian civil mi 15 thiin, 36 velin hliam an tuar a, chenna in, sakhaw biakna hmun, school, health facility leh tlanchhiate awmna camp-te an kahchhiahsak tih an sawi bawk.