Vladimir Putin-a'n Criminal record neite sipaia ṭantirna tur dan pawm

Russia president Vladimir Putin chuan an ram mi, pawikhawihna hrang hrang - tualthah, rukruk, ruihhlo tawlh leh pawikhawihna liantham dang lo nei tawhte Criminal Code of the Russian Federation hnuaia sipaia ṭantirna tur dan siam chu pawmin a hming a ziahhnan.

Pawikhawihtu, sipaia ṭan tir theih zingah hian kum tlinglo mipat hmeichhiat lam hawia khawih leh sorkar official thahnaa inhnamhnawihte erawh an tel lo.

Vladimir Putin chuan Ukraine nena an indo mekah sipai 18,000 tirh belh an ni tawh tih kar liam ta khan a sawi. September 21 khan President Putin hian indonaah Russia sipai nuai thum vel tirh belh an nih tur thu a lo sawi tawh a ni.

Russia leh Ukraine hi thla kua an indo tawh a, Russia hian Ukraine khawpui hrang hrangte chu missile hmangin a kap reng a ni. Russia hian Ukraine beihna atana Iran siam 'Kamikaze drone' a hmang niin Ukraine chuan a sawi. Iran chuan hemi chungchang hi hun eng emaw chen a phat hnuin, Inrinni khan Iran foreign minister Hossein Amir-Abdollahian chuan Russia hnenah hian drone ṭhahnem tak an thawn tih a sawichhuak. Mahse drone an thawn hian Russia leh Ukraine indo hma a ni tih a sawi bawk. Indonaa hman turin Russia hnenah missile an supply tia sawi chu thu dik lo a ni tih a sawi.