Peru President ban phutin mipuiten kawng an zawh

Peru ram mipuite chuan an president Pedro Castillo chu bang tura phutin Inrinni khan an ram khawpui, Lima-ah kawng an zawh.

Kawngzawhnaah hian tel an ṭhahnem hle a, President Castillo leh a kaihhruai an duh lohna thute an au pui in, police-te chuan kawngzawhte hi lo dan tumin, hnawhdarh nan tear gas te an hmang a ni.

President Castillo chuan a kaihhruai sorkar duhlotute chu mipuite hmelma tiin a sawi.

Nikum July thlaa Presi­dent atana lakluh, Castillo hian paihthlak tumna ṭum hnih a paltlang tawh a ni. Eptu pawl legislator-te chuan paihthlak tumin hma an la leh a, mahse President paihthla tur hian Congress-ah thlawptu an ngah tawk lo.

Kum 53 mi, President Castillo hi dik lo taka thiltia puhna parukah chhui mek a ni a, mahse amah chuan tih dik loh engmah a neih loh thu a sawi. October thla khan attorney-general chuan President leh a chhungte chu criminal organisation-ah an tel nia sawiin, complaint a lo thelut tawh bawk.