Pakistan President-in Imran Khan a tlawh ; Buaina sukiang tura hmalak a intiam

Pakistan President Arif Alvi chuan PM hlui Imran khan-a party, Pakistan Tehreek-e-Insaf (PTI) party leh prime minister Shehbaz Sharif kaihhruai sorkar inkara buaina awm mek chu sutkian a nih theihnan hma a lak tur thu sawiin, lungawi lohna an lantir laia a kea kah hliam Imran Khan chu a tlawh.

Kum 70 mi, Khan hi Ningani liam ta khan Punjab province, Wazirabad area-ah Shariff kaihhruai sorkar lakah protest march an huaihawt laiin, a ke ding lamah kah a ni.

Inrinni liam ta khan President Alvi leh first lady, Begum Samina Arif Alvi-te chuan Khan hi an enkawl mekna, Lahore-a Shaukat Khanum Memorial Cancer Hospital and Research Centre-ah an tlawh a, darkar thum vel zet an awm.

Kumin April thlaa National Assembly-a no-confidence motion hmanga paihthlak tak, Imran Khan chuan Pakistan-ah hian inthlanṭhat ngiatin a nawr mek a ni. Mahse, prime minister Shehbaz Sharif sorkar chuan tunhnai maia inthlan ṭhat chu thil theih a nih loh thu a sawi thung. Sorkar lai term hi August 2023 thleng tur a ni.

Pakistan sorkar chuan Inrinni liam ta khan, Pakistan Electronic Media Regulatory and Authority (PEMRA) chu PTI Chairman Imran Khan-a press conference tihchhuah khapna thupek chu hlip turin thu a pe. PM Shehbaz Sharif chuan media watchdog-te chu an ram danpui, Article 19 (freedom of speech) zawm zel a nih theihnan uluk taka dan kengkawh zawm zel turin a ngen zui bawk.