Saudi Arabia-ahFrance president a zin

France President Emmanuel Macron chu Saudi Arabia ramah a zin a, Crown Prince Mohammed bin Salman nen Riyadh-ah an inkawm.

Tunlaiin Saudi Arabia leh Lebanon inkar boruak a ṭha lo hle a, Lebanon Prime Miniter Saad Hariri chuan Saudi Arabia aṭang hian kar kalta Inrinni khan PM aṭanga a ban thu a puang a, vauna te a dawn avangin a nunna atan a hlauhthawng niin a sawi. Hetih lai hian Lebanon chuan Hariri hi bang turin Saudi Arabia hian a nawr niin a ngai thung.

France President Macron chuan Saudi Arabia hruaitute chuan Lebanon nena an inkar boruakṭha lo awm mek siamṭhat a nih theih nana hma la tura a ngen tur thu a sawi a, hei bakah hian Yemen tualchhung indona thleng mek chungchang pawh sawipui a tum bawk. Saudi Arabia kaihhruai Arab ṭangrual ramte chuan Yemen sorkar thlawpin, helho lakah beihpui a thlak fo a, Yemen kalpawhna kawngpuite chu Thawhṭanni aṭang khan a khar vek avangin indona avanga harsatna tawk mekte chhawmdawlna tur pawh a lut thei lo a ni.

Saudi Arabia chuan Yemen aṭang hian an ram bei tur missile kah a nih vanga kawngpui hi dan anih thu a sawi a, he missile hi Saudi khawpui bulah hian an lo kapthla niin a sawi.

United Nations chuan Yemen tualchhung indona thleng vang hian Yemen mipuite chuan harsatna nasa tak an tawk mek a, kawngpui hi hawn a nih thuai loh chuan mi nuai tel chu ei tur neiloin, rilṭamin an awm thei dawn niin a sawi.