Halloween hmannaa chhiatna thleng vangin SKorea President-in ngaihdam a dil

South Korea president Yoon Suk-yeol chuan Seoul khawpuia Halloween hmannaa chhiatna rapthlak thlenga mi 156 thihna thleng avangin ngaihdam a dil a, chhiatna thlen ṭuma hma la ṭha tawk lo official-te chu hremna pek an nih tur thu a sawi.

Nimin khan Holloween hmannaa innekbuaina thlenga mi tam tak thihna thleng vangin President Yoon hoin safety rules ennawnin meeting neih a ni. President Yoon chuan, "An fanu leh fapate chantu, nu leh pate dinhmun nen kan inkhaihkhin ngam lo. Mahse mipuite nunna venghim a, an himna tur ngaihtuahsaktu tur President ka nihnaah, he thil thleng hian ka rilru a tina a ni," a ti. Chhiatna thleng thi chhungte leh hliam tuarte chungah ngaihdam a dil takzet tih a sawi bawk.

October 29-a Seoul-a Itaewon district-a chhiatna thlenga thi, mi 156 zingah hian ram dang mi 26 an tel. Mi 197 in hliam an tuar bawk a ni.

Chhiatna thlen ṭuma police-te chetdan chuan sawisel a hlawh hle. Kar liam taa emergency call hrang hrang siamte tihchhuahah, mi ṭhenkhat chuan inpawngnekna thlen hma hian chhiatna thlen a hlauhthawnawm thu leh, police-te chu inrawlh thuai tura ngena an biaknate a awm a ni. Ṭhenkhat chuan chhiatna thlen hma darkar li velah police-te hi biain, mipui pungkhawmte thunun turin an ngen. Pakhat phei chuan mipui pungkhawm tam lutuk vangin chhiatna rapthlak tak thleng mai thei a nih thu pawh a sawi.

Yonhap news agency chuan police-te hian report an dawn aṭanga pakhatah hian 'Code 0' a tichhuak nia sawiin, hei hi rang taka bawhzui nghal tura tih a ni a, a hnua call pasarih an dawnah 'Code 1' a tichhuak leh bawk a, mahse officer-te chuan thupek angin hma an la zui nghal lo niin a tarlang. President Yoon pawhin emergency call transcript tihchhuah hnuah police-te chetdan a dem thu a lo sawi tawh a ni.