Imran Khan-a thlawptuten Kawng an zawh chhunzawm dawn

Pakistan prime minister hlui Imran Khan chuan inthlanpui buatsaih hma phuta kawng an zawh chu beih an tawh vangin chawlhsai lailawk a nih hnuah, vawiin aṭangin amah thlawptute chuan an chhunzawm leh tawh dawn tih a sawi.

Imran Khan hi rally an neihnaah silai kengin a ke ah a kap hliam a, Lahore damdawi-inah enkawl mek a la ni.

Pakistan Tehreek-e-Insaf (PTI) hotu chuan amah leh midang 11-in beih an tawk a, PTI worker Moazzam Gondal-a kahhlum a nihna hmun, Wazirabad aṭangin rally hi neih chhunzawm leh a ni dawn tih a sawi.

A hliam a la dam loh avangin a zawm ve nghal thei dawn rih lo a, mahse Rawalpindi an thlen hunah chuan a zawm ve thei tawh dawn niin a sawi. A zawm ve theih hma chu rally hi foreign minister hlui Shah Mahmood Qureshi chuan a ho dawn a ni.

Kum 70 mi, Khan hian beih a tawh chungchangah Pakistan prime minister Shehbaz Sharif, interior minister Rana Sanuallah leh Pakistan army top general chu amah tihhlum tuma phiarruah puhin, an pathum hian bang turin a phut tih a sawi bawk.