Nov 15-ah khawvela mihring awm zat tld 8 tling dawn

United Nations Population Division chuan khawvela mihring awm zat chu November 15 hian tluklehdingawn 8 a tling dawn niin a chhut.

Kum 1950 khan khawvela mihring awm zat hi tld 2.5 niin, kumin November 15-ah chuan a let thum aia tamin a pung tawh dawn a ni.

Kum 1960 chho lam khan mihring an pung chak hle a, mahse hemi hnu hian a punna hi a tlahniam ṭan a ni. Kum 1962 - 1965 inkar khan mihring punna hi kum khatah 2.1% a nih laiin, kum 2020-ah chuan 1% hnuai lamah a tla thla tawh. Kum 2050-ah chuan 0.5% velah a tlak thlak belh dawn niin UN proejct chuan a tarlang bawk.

Mihring punna tlahniam zel mah se, mihring an dam rei chhoh zel avangin, UN project chuan kum 2030-ah khawvel mihring awm zat chu tld 8.5 ni turin a chhut a, kum 2050-ah tld 9.7 leh kum 2080-ah tld 10.4-ah pung hman turin a chhut.

UN-in mihring pun dan tur a chhut aṭangin, kum 2050-a mihring punna tam ber tur chu ram pariat - Democratic Republic of Congo, Egypt, Ethiopia, India, Nigeria, Pakistan, the Philippines leh Tanzania-ahte niin, khawvel puma mihring pung zat zinga a zahve chu heng ram pariat aṭang hian an ni dawn niin a tarlang. Khawvela mihring tamna ber ram ni mek, China chu kum 2023 kumtir lamah India-in a pel dawn niin a chhut bawk.

Hetih lai hian group dangte nena an chhut dan erawh a in ang lo thung. US-based Institute for Health Metrics and Evaluation (IHME) chuan khawvela mihring tam ber hun kum 2064-ah thlengin tld 10 an tling dawn lo niin a chhut a, kum 2100-ah chuan tld 8.8 velah tlahniam turin a sawi thung.

Khawvel pum huapa chhutin, kum 1990 chho khan mihring dam chen hi chawhrualin kum 63 vel angin chhut a ni a, 2019-ah kum 72.8 niin, kum 2050-ah chuan chawhrualin mihring dam chen hi kum 77.2 vel tura chhut a ni. Kum 2022-a mihring damlai zinga kum 65 chunglam awm zat 10% chu kum 2050-ah 16% ah a pung bawk ang.