Spain PM-in Catalonia a tlawh

Spain Prime Minister Mariano Rajoy chuan nimin khan Catalonia a tlawh a, December thlaa regional election neih tur atan an party, Popular Party tan campaign bul a ṭan.

Mariano Rajoy hian nimin zing khan an party meeting buatsaihah thu a sawi a ni.

Catalonia bial hian October thla khan Spain aṭangin independence a puang a, hei vang hian sorkar laipui chuan Catalonia sorkar chu ṭhiatin, sorkar laipui rorelna hnuaiah a dah a, December thla regional election neih tur a puang nghal a ni. Catalonia sorkar hruaitute chu ban niin, an zinga ṭhenkhat chu man an ni bawk.

Catalonia president hlui Carles Puigdemont leh thawhpui ṭhenkhat chu ban an nih hnu hian Belgium ramah an tlanchhia a, tun thlengin an la awm a ni.

Hetih lai hian Inrinni khan Catalonia khawpui, Barcelona-ah mi tam takin Catalan hruaitute man an nih duh lohna lantirin nawrh an huaihawt. Mipui pungkhawmte chuan Catalan hruaitu mante chu chhuah tura an phut thu an sawi. Barcelona municipal police chuan Inrinni-a nawrh huaihawtnaa tel hi mi 750,000 an tling niin a sawi. Catalan hruaitute hi sorkar dodal zawnga thilti leh, Spain laka independence kalpuina turah sorkar sum dik lo taka hmangah puh an ni. Catlan official hlui paruk mante chu Spain Supreme Court-in bail-in a chhuahtir tawh a, hetih lai hian Puigdemont leh a minister hlui pali-te chu Belgium khawpui, Brussels-ah an la awm a, an chungthu dik taka ngaihtuah a nih theih dawn loh chuan Spain-ah kir an tum lo tih an sawi. Puigdemont hian December-a regional election neih tur chu chuh a tum thu a lo sawi tawh bawk.

Catalonia sorkarin Spain laka independence a puan hi European Union chuan a thlawp lo a, independence puan anih hnua hian Catalonia bial chhunga bussiness headquarters 2,400 chuang zet chu ramchhung hmun dangah an insawn tawh a ni.