Iraq-ah thlan hmuchhuak

Iraq sipaite chuan Hawijia khaw bulah mi 400 chuang a ruala phumna thlan an hmuchhuak tih an sawi.

Hawijia khua hi October thla thleng khan Islamic State (IS) firfiakten an awp a, sipaite thlan an hmuhchhuah pawh hi firfiakte'n an thate an phumna nia rin a ni. Kirkuk province governor, Rakan Said chuan thlan an hmuh hi khawpui dai mai, airbase bul lawkah a nih thu a sawi.

Thlana ruang an hmuh zinga ṭhenkhat chu civil thawmhnaw inbel an ni a, ṭhenkhat chuan IS-te'n an tihhlum turte an hak tir ṭhin, jumpsuit an ha thung. Rakan Said chuan IS rorelna hnuaiah hian airbase chu intihhlumna hmunah hman a nih thu a sawi.

Iraq sipaite hian IS ho awp ṭhin bial chhunga a ruala mi tam tak phuma thlan eng emaw zat an hmuchhuak tawh a ni. Nikum khan a ruala mi phumna thlan lian 72 zet hmuchhuah anih thu tarlan a ni tawh a, heng hmuna ruang an phum hi 5,200–15,000 vel an nih rin a ni.