US leh SKorea sipaite'n indo nunchan zir

United States leh South Korea lawng sipaite chuan kar kalta Inrinni aṭang khan indo nunchan an zir dun.

Ni li awh tur indo nunchan zir hi South Korea khawchhak lam tuipuiah neih a ni. He nunchan zirnaah hian US indo lawng lian leh chak, USS Ronald Reagan, Theodore Roosevelt leh Nimitz te chu vawiin hian an tel dawn. Hei bakah hian US Aegis lawng 11 leh South Korea navy lawng lian 11 leh Aegis lawng pahnih an tel bawk ang. Aegis technology hi missile kapthla thei lawng an ni.

South Korea sipai chuan thuchhuah siamin, sipaite nunchan zir dun hi ram pahnih sipaite thawhdunna tihchak leh tihlenna tur a nih thu a sawi a, hei bakah hian North Korea-in a beih thut pawha sipaite'n na zawka chhang let tura an inpeihzia lantirna a ni, a ti. Tun ṭum hi kum 2007 hnua Guam bula US carrier pathum a ruala hman anih ṭum khatna tur a ni.