Malaysia PM hlui a thubuaiah thiam loh chantir vek

Malaysia prime minis­ter hlui, Najib Razak chu sum tam tham tak tihchingpena puhna kaihhnawiha thubuai pasarih siam sakah thiam loh chantir vek a ni. 

Kum 2009-2018 chhung Malaysia PM dinhmun chelhtu, Najib hi thuneihna a chan laia sorkar sum tihchingpen bakah a thuneihna dik lo taka hmanga puh a ni. Mahse an puhnate hi thu dik lo niin a ṭang ve thung. Thiam loh chantir a nihna hrang hrangah hian kum 15-20 chhung lungin tan tir theih vek a ni dawn a, mahse a appeal dawn avangin tan tir erawh a nih mai a la rinawm loh. 

Kum 67 mi, Najib Razak hian prime minister a nih laia kum 2009-a an ram economy tihhma­sawnna tura atana a din, 1 Malaysia Development Berhad (IMDB) fund-a sum lutte a private bank account-a transfer-ah puh a ni. 

Prosecutor-te chuan PM hlui hian 1MDB unit SRC International aṭangin dan kalhin US dollar maktaduai 10 dawn a dawng niin an puh a, hei bakah hian IMDB fund ṭang hian USD tluklehdingawn khat chuang chu a mimal account-ah a pawtpeng tih an sawi bawk. US leh Malaysia thuneitute chuan 1MDB fund aṭang hian USD tld 4.5 vel rukbo niin an sawi. 

Najib hi sorkar sum tam tham tak tichingpena puh ni reng mah se PM a nih laiin thubuai  hi siamsak a ni lo a, kum 2018 inthlana a chak loh hnuah khan amah thlaktu, Mahathir Mohamed chuan a chhui ṭhat tir leh a, thubuai hi siamsak a ni ta a ni.