New Zealand-in Hong Kong nena inremna titawp ve leh

New Zealand chuan China-in Hong Kong-a security law thar a hman duh lohna lantir ve lehin, Hong Kong nena tang inthleng remtihna an lo siam tawh chu a titawp ve leh. New Zealand hi Hong Kong nena extradition treaty titawp ram palina a ni ta a ni. 

Foreign affairs minister Winston Peters chuan Hong Kong chu China kuta a innghat tlat tawh avangin an criminal justice sytem chu an ring ngam tawh lo tih  sawiin, inremna an lo siam tawh chu an titawp tih a sawi. Hemi rual hian China-in 'one country, two systems' kalphung chu ṭha taka kalpui zel a tiam theih chuan an la ngaihtuah ṭha leh thei tih a sawi nghal bawk. 

ṭChina sorkarin Hong Kong tana security law thar a siamah hian thubuai neite chu an thubuai ngaihtuah turin mainland China-ah thawn theih an ni tawh dawn a, hei hi Hong Kong mipuite bakah ram dangte pawhin an sawisel nasa hle. New Zealand hma hian Australia, Canada leh UK chuan Hong Kong nena tang inthlengna tur inremna an siam tawh chu an lo titawp tawh a ni. 

China chuan security law siam thar vanga Hong Kong nena inremna siam titawptu ramte  hi sawiselin, China ramchhung inrelbawlnaa inrawlhah a puh. New Zealand sorkar pawh international law palzutah a puh bawk a ni.