Hariri-an Lebanon-a kir thuai a tum

Lebanon Prime Minister hlui, Saad Hariri chu Saudi Arabia ramah ala cham a, a banna hi dan ang taka thehluh turin Lebanon-ah a kir thuai tur thu a sawi.

Saad Hariri hi Saudi Arabia-ah zinin, kar kaltla khan Saudi Arabia aṭang hian Lebanon PM a nihna aṭanga a ban thu hi a puang a ni. A ban thu a puan hian Lebanon mipuite a ṭhawng hle a ni.

Mahse Hariri chuan a banna chhanah Saudi Arabia a inrawlh lo tih a sawi a, Iran thlawp Shia helpawl Hezbollah te vanga bang a nih thu sawiin, amah leh a chhungte nunna pawh a derthawng niin a sawi. Hariri hian TV-a interview a neihah, Hezbollah te chuan Lebanon chu thunun vek tumah puhin, ram an tichhe mek a ni, a ti. An ram inrelbawlnaah Iran chu inrawlh nasaah a puh bawk.

Hezbollah leh Iran chuan Saudi Arabia-ah hian Hariri hi hren beh niin an sawi a, mahse Hariri chuan thu dik lo a nih thu sawiin, a duhna hmun apiangah a kal thei tih a sawi. Lebanon sorkara a banna thehlut turin an ramah hian a kir thuai dawn tih a sawi. Prime Minister dinhmun chelh zui zel tura an duh a nih chuan a policy-te chu an zahsak a, an pawmpui a ngai niin a sawi.