Inzin tawn khap reng theih a ni lo: WHO
World Health Organization (WHO) chuan inzin tawn chu khap reng theih a nih loh thu a tarlang a, chutih rualin ram hrang hrangte chuan an rama Covid-19 hri leng a ziaawm theihna tura hmalakna tur kawng tam tak an la neih thu a sawi.
Thawhṭanni khan WHO chuan press mite an kawm leh a, WHO Emergencies Programme head Mike Ryan chuan ram hrang hrangte inzin tawn khap zel a nih chuan nakin zel atan a ṭhat a rin loh thu a sawi a, economy lamah chhiatna nasa zawk a thlen theih thu a sawi. "Ram hrang hrangte chu inmamawh tawn kan nih avangin a theih chin chinah fimkhur tak siin economy a ṭhat chhoh zel theih nan inzin tawn chu khap reng theih a ni lo," a ti.
Khawvel pumah Covid-19 hri kai thar an pun belh zel avangin ram ṭhenkhatte chuan inkhuahkhirhna an hmang leh a, inzintawn pawh an khap zui leh a ni.
WHO-in press mite an kawmnaah hian WHO director-general, Dr. Tedros Adhanom Ghebreyesus chuan inkhuahkhirhna khauh tak hnuaiah lo chuan Covid-19 hri hi thunun a harsat thu leh puipunnaa kal tam loh a him thu a sawi bakah, hmaituamna hman ṭhat a pawimawh thu a sawi bawk. Canada, China, Germany leh South Korea-in Covid-19 dona kawnga an hmalaknate chu Dr. Tedros chuan a fak hle a, anni ramte hian hri len tirh khan inkhuahkhirhna khauhtak an hman avangin Covid-19 hri leng hi zawi zawiin an thunun theih thu a sawi.
July 30 hi WHO-in Covid-19 chu global health emergency a puan aṭanga thla rukna a ni dawn a, kumin January 30 khan he hri vang hian khawvel pumah health emergency a puang a ni. Kum 2009 aṭang khan WHO chuan swine flu, polio, Zika leh Ebola vangte khan health emergency a lo puang tawh bawk a ni.