EU leh US-in Myanmar sipai sorkar hrekna siam belh

Myanmar sipai rorelna hnuaia an ram buaina chuan ziawm lam a la pan thei lo a, sipaite leh sipai sorkar duhlote inkarah buaina a la chhuak fo a, sipaiten civil mite an bei chhunzawm reng bawk.

United States leh European Union chuan Thawhlehni khan Myanmar sipai sorkara mi pawimawhte hrekna an tichhuak thar leh. EU hian mi 19 hrekin, an zingah hian minister leh chief justice pawh an tel. Kum hnih chhung sipaite rorelna hnuaiah mihring dikna chanvo nasa taka palzut niin, tharum thawhna a thlen chhunzawm reng a ni, tiin European Council chuan hrekna an siam belh leh chhan hi a sawi.

EU hian kumin February thla hnua hrekna a tihchhuah leh hmasa ber niin, mi 84 leh pawl/company 11 hrekna a lo siam tawh a ni.

US chuan arms dealer, Kyaw Min Oo leh a company, Sky Aviator Company chu blacklist-ah a telh ve bawk. Kyaw Min Oo hi Myanmar sipai sorkar nena inzawmna nghet tak nei, ram dang sipai officer-ten Myanmar ram an tlawh dawn pawha a ruahmantu atana hman a ni tih US Treasury Department chuan a tarlang. Myanmar sipaite tan aircraft part leh ralthuam lam lakluhhna tur inremna pawh a hmu a ni, a ti.

Treasury under secretary for financial intelligence Brial Nelson chuan, "Sipaiten civil sorkar thuneihna an hnehchhuh hnuah an ram chhunga buaina chhuak leh, mipuite tawrhna chu Kyaw Min Oo hian a lo hlawkpui thung a ni," tiin a sawi.

Myanmar sipaiten thuneihna an chan hnua ramchhung hmun hrang hranga buaina chhuakah kum hnih chhungin mi 2,400 chuang an thi tawh a, mi maktaduai khat chuang chuan an in leh lo an chhuahsan tawh bawk niin Assistance Association for Political Prisoners chuan a tarlang.