Russia-in Kherson khawpui aṭangin a sipaite hnukdawk dawn
Russia chuan Ukraine-a Kherson khawpui aṭangin a sipaite a hnukdawk dawn tih a sawi. Kherson khawpui hi Ukraine an run hnua Russia sipaiten regional capital an lak awmchhun a la ni.
Nilaini khan Russia defence minister Sergei Shoigu chuan Kherson aṭanga sipaite inhnukdawk turin thupek hi a tichhuak a ni.
Hetih lai hian Ukraine chuan he thil hi fimkhur taka an thlithlai zui tur thu sawiin, Russia sipaite hi Kherson khawpui chhungah an la awm tho avangin inhnukdawk tia sawi theih an la ni lo, tiin Ukraine president Volodymyr Zelenskyy-a adviser, Mykhailo Podolyak chuan a sawi.
Podolyak chuan, "Kherson khawpuiah Ukraine flag a inzar hma chuan, Russia inhnukdawk tia sawi hi thil awmze nei lo a la ni," a ti.
Tun hnaiah Ukraine sipaite chuan Kherson khawpui lak let tum hian an bei mek nia sawi a ni. Kherson khawpui panna lei pawimawh tak chu kahchhiat a lo ni tawh bawk a, hei vang hian Russia chuan Ukraine chhim lam khawpuia a sipai awmte mamawh chu thawn a harsa tawh a, sipaite nunna chhanhimna atan leh, hmun danga an sipai awmte pui turin khawpui aṭang hian an hnukdawk dawn niin Shoigu chuan a sawi a ni.
Indonaah Russia sipai thi leh hliam nuai 1 tling tawh : US general
US general Mark Milley chuan Russia-Ukraine indona thleng mekah hian Russia sipai thi leh hliam hi nuai khat an tling tawh a, heng zat bawk hi Ukraine sipai thi leh hliam an awm tawh bawk a ni, a ti.
Ram pahnihte hi thla kua an indo tawh a, indonaa sipai thi leh hliam zat dik tak hi hriat chianna tak erawh a awm lo.
General Milley chuan indonaah hian sipai tam tak an thih tawh bakah, mipuite tawrhna nasa tak a thleng mek bawk a ni, a ti. Kumin February thlaa Russia-in Ukraine ram a run aṭang khan Ukraine civil mi 40,000 vel an thi tawh niin a sawi bawk.
Russia pawh hian a sipai tam tak a chan tawh chungin, Ukraine lak tuma a beihna chu tun thlengin a la hlawhtling thei chuang lo a ni.