Taliban-ten Park leh Fair-ah hmeichhiate kal khap

Afghanistan-a rorellai, Taliban chuan hmeichhiate hrekna siam belh zelin, an ram khawpui Kabul-a public park leh funfair-ahte an kal a khap.

Khapna a siam thar hi tun kar aṭangin hman ṭan nghal a ni. Hemi hma hian hmeichhe tleirawl chin chu zirna an chhunzawm a lo phalsak tawh lo bawk a, mipa tel loin an zinchhuah a khap bakah, pawn chhuahin hijab emaw, burqa emaw hmang ngei ngei tura tih an ni bawk.

Ministry for the Prevention of Vice and Promotion of Virtue thupuangtu, Mohammad Akis Sadeq Mohajir chuan thla 15 chhung chu dan an siamte kengkawh turin hma an la a, mahse hmun tam takah an bawhchhe fo a ni, a ti. "Mipa leh hmeichhiate an awmho fo a, hijab an hmang ṭha lo bawk a, hei vang hian he khapna hi siam ani leh a ni," a ti. Hetih lai hian hmeichiate leh park operator-te chuan Taliban thupek thar hi an sawisel zui nasa hle.