IMF-in Bangladesh tan loan USD tld 4.5 pek a remti

International Monetary Fund (IMF) chuan sum lama harsatna tawk mek, Bangladesh ram sum dinhmun siamṭhatna turin USD tluklehdingawn 4.5 loan pek a remti.

IMF leh Bangladesh sorkar aiawhte hian hun rei tak inbiakna an neih hnuah, loan pekna tur inremna hi Nilaini khan an siam thei ta a ni.

South Asian ram zingah, IMF hian sum lama harsatna an tawh avangin Sri Lanka leh Pakistan-te an leibatna laka khaichhuahna tur hi a lo siamsak tawh bawk a ni. Heng ram pathumte hian coronvirus hri leng vang leh, Russia-Ukraine indona nghawng zel avangin sum lamah harsatna tawk chhoin, ei tur leh fuel man a sang chak hle.

Bangladesh puihna tur sum hi installment vawi sarihah pek a ni dawn a, kum 2026 December thlaah a hnuhnung ber tur hi a pek a ni ang. Installment hmasa ber chu nakkum February thlaah pein, USD mtd 447.48 a pe dawn a ni. Loan punna, interest rate chu loan rulh dawna market rate angin chhut a ni dawn tih Bangladesh finance minister A.H.M. Mustafa Kamal chuan a sawi a, interest rate hi 2.2% vel ni tura an chhut thu a sawi bawk.