Iran-a lirnghing vanga thi 450 an tling tawh

Iran leh Iraq inri-na bula lirnghing vanga thi chu mi 450 an tling tawh a, mi sang telin hliam an tuar bawk.

Iran Emergency Medical Service chuan lirnghing tuar nasa ber, Kermanshah province-ah chuan chhanchhuah hna thawh tihtawp a ni tawh a, lirnghing tuarte chhawmdawlna thawh a ni tawh zawk dawn tih a sawi.

Pathianni zana magnitude 7.3-a naa Iran leh Iraq inri-na bula lirnghing vang hian Kermanshah province-a khaw tam takah chhiatna nasa tak a thleng a, he lirnghing hi Iran-a province 14 in an hria a ni. Afterschock pawh ṭum 193 zet a thleng leh tawh a ni.

Lirnghing tuartu mi tam tak chu Thawhṭan zan pawh khan khawvawt hnuaiah pawn lamah an awm tlaivar leh thu report chuan a tarlang. Lirnghing tuarte awmna tur camp siam lailawk ni mah se, tam tak chu an leng lo a ni.

Iran ram hotu lu ber, Supreme Leader Ayatollah Ali Khameini chuan lirnghing tuartute a tawrhpui thu a sawi a, sorkar department hrang hrangte chuan harsatna tawkte chhawmdawl leh ṭanpui hna an theih tawka thawk turin a chah.

Iran police, Revolutionary Guard te chu lirnghinna hmunah hian chhanchhuah hna thawk turin tirh nghal an ni a, nimin khan President Hassan Rouhani pawhin a tlawh bawk.

Lirnghing vang hian chenna in 30,000 chuang a chhia niin thuneitute chuan an sawi a, thingtlang khaw pahnih chu a chhe vek a ni, an ti.