Myanmar sipaiten report tichhuak

Myanmar sipaite chuan Rakhine state-a Rohingya Muslim te laka beihpui thlak nia puh an nih chungchang a chhuina report a tichhuak.

Report an tihchhuahah hian sipaite'n Rohingya civil mite that a, an khua te halsak leh an hmeichhiate pawngsual nia an puhna chu thu dik lo anih thu an sawi a, an thil ruksak nia an puhna te pawh an pha bawk.

Hetih lai hian Amnesty International chuan army report chu a pawm lo tih sawiin, an report tihchhuah chu hmai phihfai an tumna mai a ni, a ti. United Nations pawhin Rakhine state-a Myanmar sipaite chet dan chu Rohingya te thenfai a tumna niin a lo puh tawh bawk.

Myanmar sipaite chuan kumin August thla aṭanga beihpui an thlakah hian security force-te beitu, Rohingya hel pawl, Arakan Rohingya Salvation Army (Arsa) chauh an bitum niin an sawi a, beihpui an thlaknaah hian ralthuam lian chi pawh an hmang lo niin an sawi. An ram chhung himna turin Rohingya hel laka beihpui thlak chu thil ṭul a nih thu Myanmar sorkar chuan a sawi.

Hetih lai hian Rakhine state-a sipaite'n beihpui an thlak avanga hian Rohingya mi nuai tel chu Bangladesh ramah an tlanchhe tawh a ni. UN leh human rights group hrang hrangte chuan raltlante hi an kawm kual a, an hnen aṭang hian civil mite thliar hrang loin, sipaite chu rawng takin an che tih an hre thei tih an sawi.

Myanmar Defence Ministry chuan Rakhien state-a general in-charge, Major General Maung Maung Soe chu sawn a nih thu a sawi a, mahse sawn a nih chhan erawh a tarlang lo. Western Command hotu thar tur hian Brigadier General Soe Tint Naing chu dah nghal a ni.