US-in Ukraine tan SKorea artillery shell leisak dawn

United States chuan Ukraine tan indonaa an hman turin South Korea siam, artillery shell 1,00,000 leisak a tum.

US official chuan 155mm artillery shell nuai khat leina tur hian US leh SKorea chuan inremna an ziakfel thuai dawn tih sawiin, hei hi Ukraine Security Assistance Initiative (USAI) fund aṭangin lei a ni dawn tih a sawi. Shell-te hi US kaltlangin Ukraine-ah hian thawn a ni em tih erawh sawichian a ni lo.

Hetih lai hian SKorea defence ministry chuan Ukraine tana lethal weapon thawn a tum loh chungchanga an dinna chu a la ngai reng tih sawiin, artillery shell chu US hman tur atana hralh turin an inbe mek niin a sawi thung. Ministry chuan thuchhuah siamin, "US-in 155mm ammunition an indaih loh avangin US leh Korea company-te chu an inbe mek a ni," a ti.

US thawhpui ram ṭha tak ni mah se, South Korea hian an ram economy avang leh, NKorea lam thlenga a inrawlh theih dawn avangin Russia nena an inkar boruak chhe thei tur hi pumpelh a tum a ni. Russia president Vladimir Putin-a'n Ukraine tana ralthuam an pe a nih chuan ram pahnihte inlaichinna thlenga a nghawng tur thu a sawi hnuah, thla hmasa khan SKorea president Yoon Suk-yeol chuan Ukraine tan ralthuam hlauhawm an thawn loh thu leh, thawn an tum loh thu a sawi a ni. Mahse Ukraine tan hian bulletproof vest, helmet leh non-lethal weapon-te bakah damdawi lamte chu a lo thawn tawh thung.