China-ah nikhata Covid-19 hri kai mi 10,000 an chuang

China ramah Covid-19 hri kai an pung chho leh zel a, kumin April thla hnu lama a ṭum khatna atan Ningani khan ni khata hri kai thar mi 10,000 chuang an awm.

Ram pumah hri kai thar hi Ningani khan mi 10,243 awmin, niminah mi 10,535 an awm bawk. China khawpui Beijing bakah sumdawnna hmunpui, Shanghai-ah hri kai hi an pung chak leh hle a ni. Chhim lama Guangzhou khawpuiah chuan ni li chhung hri kai thar hi 2,000 an chuang ziah tawh. Hri kai thar tam zualna, Haizhu district-ah chuan nimin aṭanga Pathianni thlengin hri darh zel tur venna tan lockdown puan a ni.

Hri kai an pun chhoh leh avangin president Xi Jinping hoa Ningania Politburo Standing Committee meeting chuan nitin khawsak phung tibuai loa hri darh tur veng a, awmze nei zawka hmalak a ṭul thu an sawi. Hemi rual hian an rama hri leng dinhmun chu a ṭha lo hle tih an sawi bawk.

Ram chhungah hri kai pung chho mah se, thuneitute chuan hri leng vanga khuahkhirhna an siamte erawh an thlahdul ṭhen thung. Hri kai con­tact-te ni sarih chhung inkhunghrang tura tih chu ni ngaah tihhniam a ni a, secondary contact chu chhui zui tawh lo tura tih a ni bawk.

Covid-19 hri a len tirh aṭang khan China hian inven­na nasa taka kalpui nghalin, inkharkhipna khauh tak tak a siam nghal a, hei hian mi tam tak nunna pawh a chhanhim phah nia sawi a ni. Hetih lai hian inkharkhipna siam hian an ram economy leh, mipuite nunphung thlengin a nghawng a, mipuite lungawi lohna thawm hriat tur pawh a awm phah fo a ni.