Kum 5 hnuah Big Ben inkhawng ri leh dawn ta

London khawpuia Big Ben sanapui chu kum nga chhung siamṭhat a nih hnuah, Pathianni aṭang hian dan pangngaiin, minute 15 danah a inkhawng ri leh thei dawn ta.

Kum 2017 khan Big Ben hi siamṭhat a ngaih avangin tihtawp a ni. Sana inkhawng ri tihtawp a nih hian Parliament member leh staff-te chu sana awmna hnuaiah an kalkhawm a, ṭhenkhat phei chu an mittuite a tla hial a ni.

Kum nga chhung USD mtd 90 senga siamṭhat a nih hnu leh, a part 1,000 chuang zet thlak a nih hnuah kar khat chhung an enchhin leh phawt a ni. Pathianni-a an ram huna chawhma dar 11 aṭangin he sanapui dar, ton 13.7-a rit chu a hunbi pangngai angin a inkhawng ri leh thei dawn ta a ni. A dar lian ber hi darkar khat danah riin, a dar te palite chu minute 15 danah an inkhawng ri ṭhin a ni.